புன்னகை

2010-05-16T01:49:00.000+05:30

திறக்கின்ற கதவின் வேகம்
காற்றின் வேகமாய்
கோபத்தின் வெளியீடாய்
சிதறி கிடக்கும் காலணிகள்
மனதை அறியும் குறியீடாக
வெளியீடுகள் மட்டும் வெவ்வேறாக
பெரியவர்களுக்கும், சிறார்களுக்கும்
வடிகால் கிடைக்காது
வீடு முழுக்க மனிதர்கள்
பிம்பங்களில் மூழ்கி
முத்தெடுக்க விளைகின்றனர்

காரணகர்த்தாக்கள்

2010-05-14T01:43:00.002+05:30

புன்னகை என்ன விலை-3

மாவேயிஸ்ட்களின் ஆண்டு வருமானம் 2 ஆயிரம் கோடி என்கிறார்கள்

வருமானம் தொழிலதிபர்கள், ஒப்பந்தகாரர்களிடம்

மிரட்டி வாங்கிய பணம் என்கிறது பத்திரிக்கைகள்

இதையும் கூறுமா அரசோ அல்லது பத்திரிக்கைகளோ அனைத்து பணமும்

கறுப்பா அல்லது வெள்ளையா என்று

கொலை செய்தவனை விட கொலை செய்ய தூண்டியவன் முதல் குற்றவாளி
கொலைக்கு உடந்தையானவனும் குற்றவாளி
என்கிறது அரசின் சட்டம்

தன் இலட்சியங்களில் இலக்கை அடைபவர்கள்

இடர்களில் மற்றவர்களை பழிகடாக ஆக்குபவர்கள்

சாதகமானவர்கள் அனைவரும் நண்பர்கள்

பழிகடாக்களானவரகள் குற்றவாளிகள்

கடைசியில் காரணகர்த்தாக்களாக

கனவு வாழ்க்கை

2010-04-09T03:12:00.003+05:30

கை நிறைய சம்பாதி்க்க
கவலை இல்லா வாழ்க்கை வாழ
கனவுகளின் தேசத்தை நோக்கி
கடல்கடந்து காலடிவைத்தபின்
கனவுகள் எல்லாம் காணல்களாய்
கணக்குகளில் காலங்களை கடத்தி
கனவுதேச வாழ்க்கையின்
திரும்பல்களில்
கடவுசீட்டுகாரர்களிடம்
கரன்சிகளின் வழியே வெளியேற
கன்னியவான்கள் ஆட்சி மாறி
கனவான்களாக மாற ஆசைபட்டு
கடைமடைகள் எல்லாம் கட்டிடங்களாக்கி
கனவுதேசமாக்கி
கனவு வாழ்க்கை வாழ தயாரகின்றோம்.

சுவாசபயிற்சி

2010-04-09T02:00:00.000+05:30

சுவாசத்தை சீராக்குவது சுலபம்
விளம்பரத்தில்
முழு மூச்சாக போனதில்
சுவாசம் சீராக போனதை விட
சீறாக சேர்த்து கொண்டிருந்தார்
விளம்பரம் கொடுத்த வியாபாரி

சிறுபுன்னகையின் வழியில்

2010-04-08T12:39:00.002+05:30

மறுதழிப்புகள்
கடுமையான வார்த்தைகள்
வாக்குவாதங்கள்,அனைத்தும்
சாம்பலாகிறது
குழந்தையிடம் கற்றுக்கொண்ட
சிறுபுன்னகையின் வழியில்

காடும் கழனியும் கட்டிடங்களும்

2010-03-27T13:43:00.002+05:30

காடும் கழனியும் கம்மாவும்
கட்டாந்தரைகளாகவும் கட்டிடங்களாகவும்
மாறிப்போயின
நடவு நட்டவனின் வாழ்க்கை
நட்டாற்றில் போயின
அரிச்சுவடி படிக்க
ஆயிரக்கணக்கில் தேவையாகிப்போக
அறிவியல் படிக்க லட்சங்களில்
மாறிப்போனது
நாடளுபவனின் அறிக்கையில்
விலைவாசி இனியும் குறைக்க இயலாது
நட்டாற்றில் போனவனின் வாழ்க்கை
கேள்விக்குறியாகிப்போனது.

கொட்டமடிக்கும் ஆமைகள்

2010-02-08T13:52:00.000+05:30

கலையுலகில்
அரசியல் புகுதல்
ஆமை புகுந்த வீடாம்
கலையுலகின் மூத்தவரின்
கூற்று
உயிர் இழக்கும் தமிழர்
கடலில் தத்தளிக்கும் மீனவர்
காய்ந்து கருகும் காவிரிக்கரை மக்கள்
இங்கு கொட்டமடிக்கும் ஆமைகள்
தீர்வு என்ன மூத்தவரே

பெயர்ச்சொல்

2010-02-07T12:23:00.004+05:30

பெரியவரின் பெயரை கூப்பிட்ட பொழுதொன்று
கைகலப்பில் முடிந்தது
மற்றொரு நாளில்
பெயரை சொல்லும் பேத்தியின்
மழலைப்பேச்சு பெரியவரின்
பெருமையாகிப் போனது.

மனம் மாறும் நொடிகள்

2010-02-06T14:40:00.002+05:30

ரம்மியமான மழைக்கு முன்னலான குளிர்காற்று
மனதை வருடும் பாடல்கள்
மறுநொடி மழையை கலைக்கும் மணல்காற்று
முகத்தில் மோதும் மண்
காதில் விழும் சத்தமாகிப்போனது பாடல்

இயல்பின் நினைப்பில்

2010-02-05T02:40:00.004+05:30

பரபரப்பான வாழ்க்கையின்
இளைப்பாற விரும்பும்
நவீன கொண்டாட்டங்கள்
பெரும்பாலும் மற்றுமொறு
களைப்படையும் செயலாக
அல்லது
காசு இளைக்கும் செயலாக

****************

தனிமை
கிளரும் நினைவுகள்
வெளிவர விரும்பும்
பரபரப்பான சாலைகள்
அமைதியாக நடக்க முயற்சிக்கும் தருணங்கள்
பெரும்பாலும் அமைதியின்றி
முடிவடைகின்றன

மாடி வீடு

2010-01-25T08:22:00.002+05:30

பெருமை பொங்க பேசிக்கொண்டிருக்கிறான்
வெளிநாட்டு கட்டிடங்களை பற்றி
சாலைகளைப் பற்றி
குடியிருப்பு அட்டைகளை பற்றி
விமான பயணத்தைப் பற்றி
தான் வாழ்ந்து கொண்டிருந்த
வாழ்க்கையை தவிர்த்து

**************

குழந்தை அழும் சத்தம்
காதை பிளக்கும் பாட்டை
மீறி கேட்கிறது பேருந்தில்
அமர்ந்திருந்த பயணிகளை தவிர்த்து
நிற்கின்ற அனைவருக்கும்

யானை போரடிச்ச நிலம்

2010-01-18T08:26:00.000+05:30

யானை வச்சு போரடிச்ச காலம் போய்
மிஷின் வைச்சு போரடிச்ச காலமும் போய்
ஆளு அடிக்கிறளவு கதிரு மட்டும்
ஆனா அதுக்கும் ஆள் காணல

அரசாங்கம் அறிவிச்ச 100 நாள் 100ரூ
சம்பளத்துக்கு, அறிவிக்காத
தலையாரிக்கு 25 தலைக்கு 75
ஒத்துகிட்டு போயாச்சாம்

மூனுபோகம் விளைஞ்ச நிலம்
ரெண்டு போகமா மாறி
இப்ப ஒருபோகத்துக்கே
வானம் பாத்த பூமியா இருக்க

ஒத்துகிட்டு போறவரையா
குத்தம் குறை சொல்லமுடியும்

பிரச்னை வரும் போது மட்டும்
பேச்சு வார்த்தை கோர்ட்டு, கேஸு
ஜால்ஜாப்பு
சொல்லி

சாமானியானா காண்பித்து
சகலத்தையும் சாப்பிட்டு
ஏப்பம் விடற கும்பல்

ஆள் இல்லாம
நிலத்த ப்ளாட் போடு
இல்லை தொழிற்சாலைக்கு
தாரை வாரு

சொல்லாம சொல்லுதா

அரண்டவனின் கண்ணுக்கு

2010-01-07T12:57:00.003+05:30

பொய்க்கூரைகள் அதிருகின்றன
யாரும் கவனிப்பாரில்லை
பயந்து போன நான்
அருகில் இருப்பவனை அனுக
சகஜம் என்கிறான்
டிசம்பர் 26 பயமே போகாத நிலையில்
கடந்த காலத்தில் இதுபோல் இல்லையே
இன்னொருவனை அனுக
வெளியில் கூப்பிட்டு காண்பிக்க
சாலை வேலைகள் நடந்துகொண்டிருந்தன

திருமணம்(க்) காலம்

2010-01-06T11:44:00.001+05:30

அண்ணன் வந்திருந்தார்
உறவுக்காரர் கல்யானத்திற்கு
பத்திரிக்கை வைப்பதற்காக
தாளமுடியாத சந்தோசம் எனக்கு
இன்று வெளியில் போகலாம்
நாளை டீச்சர் அடிப்பார்
வாங்கிக்கொல்லலாம் ஒருநாள் தானே
மற்றொன்று ஊருக்கு போகலாம்
கல்யாணத்தில் பந்தி வாடிக்கலாம்
கூட்டாளிகளுடன் சேர்ந்து
தம்பி இங்க தண்ணிர் ஊத்து
பெரியவரின் குரல்
நீ பட்டு மகன் தானே
ஆமாம் தாத்தா என்னை கண்டுகொண்டதில்
மகிழ்ச்சி ஊற்றெடுக்க
தம்பி இங்க டம்ளர் இல்ல பாரு
இன்னொரு குரல்

தங்கையின் திருமணம்
ஒருவாரம் முன்னாடி வந்திரு தம்பி இது அப்பா
பத்திரிக்கை போஸ்ட்,மெயிலில் அனுப்பியாயிற்று
பந்தி வாடிக்க சமையர்காரர்களிடம் கொடுத்தாயிற்று
இரண்டு நாளைக்கு முன்னாடி வந்தா போதாதா
இது நான்

மணற்குன்றுகள்

2010-01-01T13:20:00.002+05:30

ஒவ்வொரு புத்தாண்டும் புத்தம் புதிதாகவே
எண்ணிக்கையிலும் உறுதிமொழிகளிலும்
ஆண்டுகளும் உறுதிமொழிகளும்
அதன் காலங்களில்
கரைந்து போக
குழந்தைகள் கட்டும்
மணல் குன்றுகளைப்போல்
கட்டிக்கொண்டே இருக்கிறேன்
கோட்டைகளையும் குறிக்கோள்களையும்
ஒவ்வொரு ஆண்டும்

புத்தாண்டு வாழ்த்துக்கள்

2009-12-31T23:48:00.002+05:30

அனைவருக்கும் இனிய புத்தாண்டு வாழ்த்துக்கள்- ஜோதி

குளக்கரை

2009-12-26T13:20:00.004+05:30

யாருக்கும் தெரியாமல் வீட்டிலிருக்கும் பாத்திரம்
கொட்டாங்கச்சி பின் கூம்பு வடிவில் களிமண்
,மா இலை, கருப்பும் சிகப்பும்
கலந்து கிடக்கும் ஒரு விதை
எல்லாம் சேர்ந்து கரகம் ரெடி
திருவிழாக்காலங்களில்
சிறுவயதில் விளையாடும்
விளையாட்டு அனைத்தும், குளக்கரையில்
இன்று விரால் மீனு சாக்கை வைத்தாவது
போகலாம் என்றால் வாய்க்கவில்லை
2012 திரைப்படம் பார்த்த
கனவின் விளைவில்
மார்கழிப் பனியின் கடுங்குளிரை
பொருத்தாது குளக்கரையில் நிற்கின்றேன்

குக்கிராமங்கள்

2009-12-21T00:51:00.007+05:30

கீற்று குடிசைகளும்

வேலைக்கு போக காத்திருப்போரும்

புத்தகமூட்டைகளை தூக்கிகொண்டு

பேருந்துக்காக காத்து கிடக்கும்

சிறார்களும் நிரம்பிய குக்கிராமங்களை

பேருந்து பயணங்களின் ஊடாக

பால்ய காலத்தில் காலடி வைத்த மகிழ்ச்சி
எனக்கு மறுபுறம் அவர்கள்

எப்பொழுது வெளிவரபோகிறார்கள்

என் பால்யகாலத்திலிருந்து

மரம் பிரம்மை

2009-12-19T18:59:00.007+05:30

அடர்குளிரும் காரிருளும்
ஊடுருவிய காலத்தில்
அறைக்கு திரும்பினேன்
பிரம்மைகள் ஏதுமி்ன்றி
ஆந்தையின் அலறலும்
வண்டுகளின் ரீங்காரம்
இல்லாமையால் என்கிறாள் துணைவி
இவை எங்கு வசிக்கும்
மகளின் கேள்விக்கு
மரங்கள் ! இல்லா நகரத்தில்
வசிக்கும் நான்

அருகாமை தொலைப்பில்

2009-12-17T13:20:00.006+05:30

அப்பா எங்க என்ற கேள்விக்கு
மறுவிநாடி கம்ப்யூட்டரை
காண்பிக்கிறாள் மகள்
பெருமையாய் இருந்தும்
சிறுமையாகிறேன்
அருகாமை தொலைப்பில்

------------
பன்னீர் தூரலாய்
மழைத்தூறல்
கிளரப்பட்ட நினைவுகள்
இரங்க மறுக்கிறது
இறக்கவும் மறுக்கிறது

கண்ணாமூச்சி

2009-11-17T20:17:00.010+05:30

Thanks pic courtesy Helaine Art

இண்டு இடுக்குகளில் ஒழிந்துக்கொண்டு
நர்த்தனம் ஆடிக்கொண்டிருக்கிறது
நடக்கும் நிகழ்வுகள்
அடுத்தக்கட்டத்தின் கேள்விக்குறியாகவே
கண்ணாமூச்சி விளையாடிக்கொண்டிருக்கிறது காலம்
அருகில் இருப்பவனை விட
தூரத்தில் தோழன் இருப்பில்
ஆட்டம் முடிந்தாலும்
அடுத்த கட்டத்தி்ற்காக அருகில் இருப்பவனையும்
தோழனாக்க முயற்சிக்கிறேன்

உறக்கம்

2009-09-08T11:33:00.003+05:30

உறங்குவதை விட
உறங்குவது போல் பாவனை
செய்வது சுலபமாகிப்போனதால்
என்னவோ
வெறுமை சூழ்ந்ததொரு
நீண்ட இரவுகளாகி போகின்றது
இக்காலங்களில்

மௌனம்

2009-09-03T02:30:00.002+05:30

உள்ளக்குமுறலின் வடிகாலாக

அடக்கி வைக்கும் அழுகையின் அடையாளமாக
புரட்டிப்போடபோகும் புயலின் முன்னெச்சரிக்கையாக
சமயத்தில்
சம்மதத்திற்கு அறிகுறியாகவும்
மௌனம்

புன்னகை என்ன விலை 02-09-09

2009-09-02T10:30:00.008+05:30

திட்ட கமிஷன்களும் அறிக்கைகளும்

பெரும்பாலான கமிஷன்கள் அனைத்துமே கமிஷனுக்கா

அல்லது கண்துடைப்பா என்ற சந்தேகம் வலுத்து

கொண்டே தான் போகவைக்கின்றன.

அரசாங்கங்களின் அறிவிப்புகளை நியாயபடுத்துவதற்காகவோ

அல்லது அறிவிப்புகளின் எதிர்ப்புகளை சமாளிக்கும்

ஆயுதமாகவே பயன்படுத்தபட்டு வருகின்றன

ரயில்வேக்கான கமிஷன் அறிக்கை லாலு ரயில்வே

அமைச்சராக பதவி ஏற்கும் முந்தைய வருடத்தில்

ரயில்வே நிர்வாகம் தொடர்ந்தால் 10 வருடங்களில் திவாலாகும்

தனியாருக்கு வார்த்துவிட வேண்டியது என்ற பாணியில்

கமிஷனின் அறிக்கை இருந்ததாக சொல்லப்பட்டது

அடிப்படையில் சில மாற்றங்களை கொண்டுவர இன்று

பணம் காய்க்கும் மரமாக ரயில்வே நிறுவனம்.

இன்று மற்றொரு கமிஷன் கேஸ் மற்றும் மண்ணெண்ணய் விலையை ஏற்ற அறிவுருத்தியுள்ளது சரியான திட்டங்களோ

நிர்வாகமோ இல்லாமல் பிரச்னைகளை கமிஷன்கள் மூலம்

சரிபடுத்த முடியும் என்றால்

பஞ்சம், தலை விரித்து ஆடத்தான் செய்யும்

மன்மோகன் சிங் போன்ற பிரதமர்கள் வெறும் அறிக்கைகளை சொல்லிகொண்டே இருக்கவேண்டியது தான்

தமிழக அறிக்கை

முதல் நாள் அரசு பால் கொள்முதல் விலையை ஏற்றியது

இரண்டாம் நாள் பால் விற்பனை விலையையும் ஏற்றி உள்ளது

தமிழக அரசாங்கமா அல்லது தமிழக வியாபாரியா ?

புன்னகை என்ன விலை

2009-08-24T09:24:00.008+05:30

டீசலுக்கான மானியங்கள் நிரந்தர தீர்வா
விவசாயிகளுக்கு 50 சதவீத டீசல் மானியம்

செப்டம்பர் 30 வரை

இந்த மானியத்திற்காக 15 கோடி ரூபாய் தமிழ்நாடு அரசாங்கம்

ஒதுக்குவதாக தமிழக முதல்வர் அறிவித்துள்ளார்

இதன் மூலம் எத்தனை விவசாயிகள் தற்காலிகமாக

பயன்படுவர் விபரங்கள் எதுவும் தெரியவில்லை

அரசாங்கம் இதனை வெளியிட்டுருக்கிறதா

யாருக்கேனும் தெரியுமா?

இது போல் தற்காலிக தீர்வுகளை மட்டுமே எத்தனை காலம்

அரசாங்கங்கள் காலத்தை ஓட்டப்போகின்றன.

நிரந்தர தீர்வுகள் எதுவும் இல்லையா?

மாற்று எரிசக்திகளை பயன்படுத்த ஆரம்பித்துவிட்ட சூழ்நிலையில்
இன்னும் டீசலுக்காக மானியம் அதன் விலையும்

நிரந்தரமானதாக இல்லாத நிலையில்?

சூரியசக்தியில் இயங்குகின்ற நீர் இறைக்கும் இயந்திரங்கள்

(solar pumpsets) மொத்தமாக வாங்கி விவசாயிகளுக்கு
மானிய விலையில் கொடுத்தால் அல்லது தவனை முறையில்

கொடுப்பது மூலம் ஒரு நிரந்தர தீர்வு கிடைக்கும்.

சிறார் காலப்பொழுதில்

2009-08-17T08:30:00.001+05:30

ஒரு உற்சாகமிழந்த
மாலைப்பொழுதொன்றில்
சிறார் காலத்தின்
ஒற்றை,இரட்டை நொங்கு
வண்டிகள்,சைக்கிள் டயர்வண்டி,
ரப்பர் குப்பி சக்கரங்களை
உடைய அட்டை கார்களில்
பயணப்பட்டு
வீட்டை அடைந்திருந்தபொழுது
கம்ப்யூட்டர் கேம்ஸ்
விளையாடிகொண்டிருந்தனர்
குழந்தைகள்

நாடகம்

2009-08-14T01:46:00.002+05:30

நெடுநாளாக முயற்சிக்கிறேன்
உள்ளிலும் வெளியிலும்
ஒருமித்ததாக இருக்க
சிலகாலங்களில்
ஒருமித்ததாக வெளியில்
உள்ளுக்குள்
சின்னஞ்சிறு குழந்தையிடம்
கூட முடியவில்லை

மீள முயற்சிக்கின்றேன்.

இரக்கம்

2009-08-13T23:04:00.004+05:30

நெரிசலான சாலையொன்றில்
நடந்த விபத்தில்
சிலர் உயிருக்கு
ஆபத்தான நிலையில்
காவலர்களுக்காக
கிடநதனர்
அந்த வழியில் சென்ற
அனைத்து வண்டியினரும்
இரக்கப்பட்டு
இறக்கவைத்து கொண்டிருந்தனர்

காவலர்களின் வண்டியை
தாமதமாக்கி

தகிக்கும் பூமி

2009-08-12T11:24:00.001+05:30

உச்சி வெயில்
பழக்கமாயிருந்தும்
உடம்பை உருக்கும் வெப்பத்தில்
உயழ்ந்ததில்லை
பார்த்ததுண்டு
இஸ்திரி பணியாளர்களையும்
அடுப்பங்கரை ஊழியர்களையும்

இப்பாலைவன பூமியில்
அவர்கள் மட்டுமல்ல
இங்கிருப்பவர்கள் அனைவரும்
உயழ தான்
வேண்டியிருக்கிறது
உச்சி சூரியனால் மட்டுமில்லாது
நடுநிசி வரை
தகிக்கும் பூமியாலும்

இயல்புகளாய் மாறுகிறது

2009-08-11T00:25:00.016+05:30

முன்பிருந்த
பரபரப்புகள் இல்லை
நள்ளிரவு 12 மணி வரை
காத்திருப்பதில்லை
விடிய விடிய
கதைப்பதில்லை
பரிசுப்பொருளுக்காக
கடை வாசல்
ஏறி இறங்கவில்லை

எப்பவோ படித்த கவிதை மட்டும்
இயல்புகளாய் மாறுகிறது

நேற்று காதலித்தேன் இன்று அதைவிட அதிகமாக காதலிக்கிறேன் நாளை இன்றைவிட அதிகமாக காதலிப்பேன்

பசலிக்கீரை சண்டை (தொடக்கப்பள்ளி நினைவுகள்)

2009-08-06T21:15:00.006+05:30

மதிய உணவுக்கு பின் இரு குழுக்களின் முன்னிலையில் பிரதிநிகள் பேசி முடிவெடுத்தனர். வாரக்கடைசியில் வரும் விளையாட்டு நேரத்தில் சண்டையை வைத்துக்கொள்வதென்று முடிவாயிற்று. கிருஷ்ணமூர்த்தி சார் புறப்பட்டு முக்கு திரும்பும் வரை காத்திருக்கவும், கவனிக்கவும் நால்வரை நியமித்தாகிவிட்டது.

வாரக்கடைசி, சார் புறப்பட்ட அடுத்த நிமிடம் பரபரப்பு பற்றிக்கொள்ள காசி முதலில் தயாரனான் சண்டியன் இன்று வரை. எங்கள் வீட்டின் சந்தில் படர்ந்திருந்த பசலைக்கொடிகள் கைமாறத்தொடங்கியிருந்தன அழுங்காமல் எல்லோருக்கும். சிறிது நேரத்தில் நால்வரும் ஆளுக்கொருவராய் துரத்த ஆரம்பித்திருந்தனர். சண்டையின் முதல் கட்டமாக சமாதன படுத்தும் முயற்சி ஒருவனால் ஆரம்பிக்க அவன் சட்டையை இன்னொருவன் இழுக்க சண்டை ஆரம்பித்தது சிவப்பு நிறத்தில் தற்காலிக கரையை ஏற்படுத்தும் பசலிக்கீரைகளே ஆயுதமாக பயன்படுத்தப்பட்டன.

இந்தச்சண்டை முடிவுக்கு வந்ததாக நினைவு இல்லை. விளையாட்டு நேரம் முடிந்தவுடன் அடுத்த வாரகடைசி வரை ஒத்திவைக்க பட்டுக்கொண்டிருந்தன ஒவ்வொரு வாரமும்.

இந்த விளையாட்டுச்சண்டைகளில் நடந்த வரைமுறைகள் நினைவுகளை தூண்டிக்கொண்டே இருக்கிறது இன்று நடக்கும் போர் செய்திகளைக்கண்டு.

பா.ராஜாராம் அவர்களின் தொடக்கப்பள்ளிக்காக !

முகமூடிகள்

2009-07-25T00:09:00.007+05:30

பெற்றோருக்கு அடங்கிய பிள்ளையாக

மனைவிககு பரிவான கணவனாக

மகளுக்கு பாசமான அப்பாவாக

அலுவலக மேலாளருக்கு பணிவாணாக

விஞ்சினால் கெஞ்சுவதும்

கெஞ்சினால் விஞ்சுவதுமாக

ஆளுக்கொன்று நேரத்திற்கொன்றாக

முகமூடிகளுடன்

பி.கு:இவரின் இந்தப்பதிவின் விழைவாக இருக்கலாம் !

சுவராசியமான பதிவர்கள்

2009-07-17T09:04:00.008+05:30

கிட்டதட்ட 10 மாதம் ஆயிடுச்சு ப்ளாக் ஆரம்பிச்சு
நானும் சுவாரசியமான பதிவர்ன்னு
நட்புடன்
நட்புடன் ஜமால் கொடுத்துருக்கார்

இன்னும் 6 பேருக்கு கொடுக்கனும் விதிமுறையோடு

தீராதபக்கங்கள் திரு மாதவராஜ் தினமும் தீராதபிரச்னைகளை சொல்றார்

வடகரைவேலன் அண்ணாச்சி போறபோக்குல மனதுக்கு இதமா எழுதிகிட்டு இருக்கார்

இயற்கை இதயப்பூக்கள் ல்ல எல்லாத்தையும் கலந்துகட்டி எழுதுறாங்க

கனவுகளை தொலைத்தல் சரவனக்குமார் கவிதையில கலக்குற ஆள்

திரு வின்சென்ட் மண் மரம் மழை மனிதன் இயற்கையை பற்றி எழுதுகிறார்

டாக்டர் முருகானந்தம் ஹாய் நலமா ன்னு மருத்துவ குறிப்புகள் சொல்றார்

அயல்தேசத்து வாழ்க்கை

2009-07-15T13:49:00.000+05:30

நிலம் வாங்கவும், வீடு கட்டவும்,
மனைவி மக்களுக்கு நகைகள்
வாங்க என்னால் இயலும்
நினைத்த நேரங்களில்
அருகில் இருப்பதை தவிர

சுருக்கபட்ட பால்யகாலங்கள்

2009-07-08T12:57:00.005+05:30

உச்சந்தலை வழியே மறு காதை
தொடும் வரை மனனம் இல்லாத காலமும்
கொல்லைபுறங்களில் மரத்தடிகளிலும்
வீட்டு வாசல்களில்
நண்பர்களுடான விளையாட்டுக்களும்
உச்சி வெயில் உன் மண்டைக்கு
மேல் தான் அடிக்குது
என்ற திட்டுக்கள் எதுவுமின்றி

3 வயதில் மனனத்தில் துவங்கி
டிவிக்களிலும் கம்ப்யூட்டர் கேம்ஸ்களிலும்
நூடுல்ஸ், பிஸ்ஸாக்களுடன்
பொழுதை கழிக்க முடியாமல்
போர் அடிக்குது என்ற வார்த்தைகளுடன்
11 வயதிலேயே மாத வயிற்று வலியுடன்
சுருக்கப்பட்டன பால்ய காலங்கள்

பெயர்மறதிகள்

2009-07-07T17:59:00.011+05:30

பரிச்சயப்பட்ட பெயர்கள்
மனதிலிருந்து உதிர மறுப்பது
வாடிக்கையாகிப்போக
நண்பர்களிடம் விவாதித்து
அவர்களின் தொல்லையாகவும்
மருத்துவர் ஊதாமல் விட்டதில்
மனது சந்தோசபட்டாலும்
உறக்கத்தின் முன்னே நடந்த
போராட்டத்தில் ஞாநிகளின்
உபதேசங்களும்,இன்னபிறவும்
மனதை அழைக்கழித்து
உறக்கத்தை தழுவும் கனத்தில்
மறந்துபோன பெயர் ஞாபகத்தில்
உறைத்தது

கார்கால மேகங்கள்

2009-06-02T14:00:00.001+05:30

என் எண்ண ஓட்டஙகளை
சித்திரங்களாக உருவாக்கும்
கார்கால மேகங்கள்
கரு(டு)மையாக இருக்கும்
என் மனதை
வெ(மெ)ன்மையாக்குகின்றன

அறிக்கைகள்

2009-05-28T14:49:00.004+05:30

விளைநிலங்களில் உருவான
தொழிற்ச்சாலையின் வாசலில்
கையேந்தி நிற்கிறான் சிறுவன்
அருகில் இருக்கும்
தொலைக்காட்சிபெட்டியில்
நிதியமைச்சரின் அறிக்கை
வறுமைகோடு குறைந்திருக்கிறது
உற்பத்தி திறன் உயர்ந்திருக்கிறது

தமிழ்ச்சமுதாயமே

2009-05-18T20:18:00.003+05:30

விடுதலைபுலிகள் ஆயுதங்களை கிழே போடுவதாக
கூறி 24 மணி நேரங்களுக்கு மேல் ஆகிவிட்டது

சிங்கள ராணுவம்
தமிழ்ச்சமுதாயத்தை அழித்துக்கொண்டிருக்கிறது

இன்னும் உலகச்சமுதாயம் எதை நோக்கி காத்துக்கொண்டிருக்கிறது

அனைவரும் நமது கவலைகளை தெரிவித்து கொண்டிராமல்
நமது மன அழுத்தங்களை இப்பொழுது
உலகச்சமுதாயத்திறகு கொடுக்கவேண்டிய தருணம் இது

இன்டர்நெட் ஜன்னல்

2009-05-06T01:09:00.002+05:30

மாலை நேரத்து மஞ்சள் வெயில்
சாமரம் வீசும் தென்றல் காற்று
குழந்தையின் புன்னகை
மனைவியின் பொய்க்கோபங்கள்
இவற்றில் ஒன்றையாவது
தேடிக்கொண்டிருக்கிறேன்
எலும்பை ஊடறுக்கும் குளிருட்டபட்ட
அறையிலிருந்து
இன்டர்நெட் ஜன்னலின்
வழியே

மே தின நல்வாழ்த்துக்கள்

2009-05-01T02:14:00.006+05:30

கொள்கைகள் வேறுபட்டாலும்
கோரிக்கைகள் வேறுபட்டாலும்
உழைக்கும் வர்க்கங்களின்
உரிமை திருநாள்
அனைவருக்கும்
மே தின நல்வாழ்த்துக்கள்

குருவிகள் பறந்து விட்டன; பூனை உட்கார்ந்திருக்கிறது

2009-04-28T10:24:00.007+05:30

அந்த வீட்டில் சிட்டுகுருவியும் நானும்
பிரசவித்திருந்தோம்
எங்களால் குருவி போல் உயரத்தில்
கூடுகட்ட இயலவில்லை
பாட்டன் பிறந்து வளர்ந்த வீடுதானே
எங்கள் சொந்த வீடும்
குட்டிகளையும் ஈர்ந்தெடுத்தேன்
எங்களால் எங்கள் வீடு
செழிப்படைய தொடங்கியது
சிலரின் அச்சத்தால்
எங்களை விரட்ட ஆரம்பித்தனர்
எங்களால் குருவி போல் உயரத்தில்
பறக்கவும் இயலவில்லை
காவலுக்கு உறும தொடஙக
அழிக்கவும் ஆரம்பித்து விட்டனர்
எங்களது முப்பாட்டனோ
மதில் சுவரில் உக்கார்ந்து
கண்ணை மூடிக்கொண்டிருக்கிறான்

டிஸ்கி:மாதவராஜ் அண்ணனின் இந்தஇந்த பதிவின் பாதிப்பில்

ஆசையே துன்பத்திற்க்கு காரணம்

2009-04-25T21:55:00.006+05:30

புத்தன் கொள்கைகளின்
மீதான விருப்பம் கொண்டு

புத்தனின் கொள்கையை
விளக்கப்போவதாக கூறினேன்

மரியாதையும், செல்வாக்கும்
கிட்டியது

தொண்டர்கள் நிறைய
சேர்ந்தார்கள்

அனைவரையும் ஆட்டிபடைக்கும்
பேராசை பிடித்த தலைவனானேன்

ஆசையே துன்பத்திற்க்கு காரணம்
புத்தனுடைய வாக்கு

அயல் நாட்டு "அப்பா"விகள்

2009-04-20T12:10:00.003+05:30

அயல் தேசம் வந்து
ஐந்து வருடம் கழித்து
60 நாள் விடுமுறையில்
ஆசையுடன் குழந்தையை அழைக்க
அந்நியனாய் வரமறுத்தது
குழந்தை

சித்திரை திருநாள் வாழ்த்துக்கள்

2009-04-14T01:13:00.003+05:30

சித்திரை மாதம் முதல் நாள் இன்று
விழாக்கோலங்கள் ஆரம்பிக்கும் காலம்
உழுகிறவனும் உழைப்பவனும் சற்று
உக்கிர வெயிலுக்காக
ஓய்வெடுக்கும் காலம்
மனதை உற்சாகப்படுத்தவும்
ஊரோடு ஒன்றிப்போகவும்
உறவினர்களோடு்ம் குடும்பத்தோடும்
மகிழ்வோடு கொண்டாட
ஆரம்பிக்க
மாதத்தின் முதல் நாளை
வருடம் முழுதும் கிடைக்கும்
உற்சாகத்திற்காக
வருடத்தின் முதல் நாளாக
கொண்டாடும் நாள்

அனைவருக்கும் சித்திரைத்திருநாள் (புத்தாண்டு) வாழ்த்துக்கள்

அரை "மா" நிலம்

2009-04-13T00:18:00.001+05:30

ஆத்தோரம் இருந்த தோப்பை வித்து
ஆத்தாளோட நகைய அடகு வைச்சு
அறிவியல் படிச்சு
வேலைக்கு போனேன்
அடுக்கு மாடியில
600 சதுர அடி வீட வாங்கி
அலுங்கி குலுங்காம போக
ஆயிரெத்தட்டு கையெழுத்து
போட்டு கடன் வாங்கி
கார் வாங்கினேன்
அயல்நாட்டிலிருந்து வேலைகொடுத்த
கம்பெனி மூடினப்பிறகு தான்
ஆத்தா சொன்னது ஞாபகம் வந்தது
அரை மா நிலத்தை வாங்கி போட்டா
அரை வயித்து கஞ்சிக்கு
வஞ்சனை இருக்காது மகனே

வறுமை கோட்டுக்கு கீழ்

2009-04-11T13:57:00.004+05:30

அரை வயிறு கஞ்சி
ஆயுசு முழுக்க குடிக்க
வக்கில்லாம
ஆண்டாண்டு காலமா
ஏராளமா இருக்கையிலே
ஊரை அடிச்சி உலையில
போடற கும்பல்
அஞ்சாண்டுல அம்பது கோடி
அக்கரை சீமையிலே
சேர்த்து வைச்சு
அறிக்கை மட்டும் வருது
வறுமை கோட்டுக்கு கீழ்
25 சதவீதத்துக்கும் மேல்

அன்னாடஞ் காய்ச்சி

2009-04-10T22:47:00.007+05:30

அம்பதுக்கும் நூறுக்கும்
நாள் முச்சூடும் வேலைபாத்து
அன்னாட பொழுது போகையில
அப்பப்ப வருகிற வயித்து வலிக்கு
ஆயிரம் ரெண்டாயிரத்துக்கு
பயந்துகிட்டு
தனியார் ஆஸ்பத்திரிக்கு போகாம
அரசாங்க ஆஸ்பத்திரிக்கு
போனா அங்கயும்
அம்பது ரூவாயை புடுங்கிகிட்டாங்க
நல்லவேளை
பிள்ளைங்களோட வயித்த நிரப்ப
காசு இருக்கு

தமிழில் நேரடியாக எங்கும் எழுத

2009-04-04T17:15:00.015+05:30

விண்டோஸில் யுனிக்கோடை பயன்படுத்தி மற்ற ப்ரோக்ராம்கள் உதவி இல்லாமல்
தமிழில் எங்கும் நேரடியாக தட்டச்சு செய்ய

உங்கள் கணினியில் தமிழ் மொழியையும் நிறுவ வேண்டும்.

அதற்க்கு கீழே உள்ள பைலை தரவிறக்கி உங்கள் கணினியில் நிறுவவும்
(பொதுவாக விண்டோஸ் சி.டி தேவைப்படும்)மாற்று பைல் இது

தமிழ்

மேற்கொண்டு செய்யவேண்டிய செயல்களை பின்வரும் நிழற்படங்கள் பயன்படும்

1. அந்த பைலை உங்கள் கணினியில் நிறுவிய பிறகு
டாஸ்க் பாரி.ல் மைக் ஐகான் தோன்றும் அதை ரைட் கிளிக் செய்து
Settings செலக்ட் பண்ணவும்

2.

3.

4.

5.

6.

இப்பொழுது உங்கள் கணினியில் தமிழ் நிறுவப்பட்டு தயாரக உள்ளது

தமிழுக்கும் ஆங்கிலத்துக்கும் மாற left alt + leftshift கீயை பயன்படுத்தவும்

தமிழ் விசைப்பலகையின் எழுத்தமைப்புக்கு

யாருக்கும் வெட்கமில்லை

2009-03-31T11:52:00.007+05:30

யாருக்கும் வெட்கமில்லை
துண்பம் வரும்பொழுது சிரி
மற்றவர்க்கு எனப்படும்பொழுது
யாருக்கும் வெட்கமில்லை

அரசன் ஆனவனுக்காக
அரை வயிறு மக்களை அடிப்பதில்
யாருக்கும் வெட்கமில்லை

ஆட்சி கட்டில் ஏற மட்டும்
அடுத்தவன் காலில் விழவும்
மற்றவன் காலை வாரவும்
யாருக்கும் வெட்கமில்லை

அடுத்தவனை குறை கூற
தன்னை மறப்பதில்
எனக்கும் வெட்கமில்லை

முற்றுப்பெறாதவை - 2

2009-03-25T00:48:00.005+05:30

நிரந்தரம் இல்லாமையே நிரந்தரம்
என்பது
கூட்டணிக்கும் கொள்கைகளுக்கும்

உளமாற உறுதி எடுத்த
முடிவில்
உள்ளம் மாறியது

முற்று பெறாதவை

2009-03-19T14:40:00.003+05:30

நிழலுக்காக ஆசைப்பட்டு
நிழலாகிப்போன வாழ்க்கை

நீருக்குக்காக ஆசைப்பட்டு
நீண்டதூரம் நடந்தாலும்
வெறும் காணல் நீருக்காய்

கண்ணால் பார்ப்பதும் பொய்
காதால் கேட்பதும் பொய்
இங்கு தீர விசாரிப்பதும்
ஒப்புக்கு சப்பாணியாய்

சமுதாயம் எங்கே போய்கொண்டிருக்கிறது

2009-03-14T11:00:00.000+05:30

பாரம்பரியம்மிக்கது,பழம்பெருமையானது.உலகத்தில் சிறந்த மக்களை உருவாக்கிய /உருவாக்கிகொண்டிருக்கும் ?சமுதாயம் எங்கேபோய் கொண்டிருக்கிறது

இதுநாள்வரை வறுமையின் காரணமாக கிராமப்புறங்களில் நடந்தேறி வந்த சிசுக்கொலை இன்று தன்னம்பிக்கை இல்லாமல் போன போதை அடிமை ஆன ஒரு இளைஞனால் தன் 4 நாட்களே ஆன பச்சிளஞ்குழந்தையைகிணற்றில் வீசி கொலை செய்திருக்கிறான்.தமிழகத்தின் தலைநகரத்தில்.

இந்த சம்பவம்,போன வாரத்தில் நடந்த தற்கொலை அனைத்தும் மீண்டும் நமது சமுதாயத்தின் கட்டமைப்பு உடைந்து வருவதையே காண்பிக்கிறது

பெற்றோர்களின் அரவணைப்பு,அருகாமை, இல்லாதவர்களே இது போன்ற செயல்களில் ஈடுபடுகின்றனர்.

பெற்றோர்களும் , அரசாங்கமும் சரியான கட்டமைப்பை உருவாக்க முயற்சிட வேண்டும்

I.T. ல் உள்ளவர்கள் ஏன் தற்கொலை செய்துகொள்கிறார்கள்

2009-03-11T06:23:00.001+05:30

எதிர்பாராத வேலை இழப்பு / வேலைப்பளு /மனசுமை

எதிர்பாராத வேலை இழப்பு
ஏன் இந்த வேலை இழப்பை இவர்களால் சாதரணமாக எடுத்துக்கொள்ள முடியவில்லை
கிடைத்துவந்த அதிகமான சம்பளம் நிறுத்தம்
அடுத்த வேலை கிடைக்கும் வரை தாக்குபுடிக்குமா கையில் இருக்கும் காசு
எவ்வளவு நாள் ஆகும் இன்னொரு வேலை
அது சொல்லுவது கடினம் , ஏன்
என்னுடைய படிப்புக்கு நிகராக நிறைய பேர் இருக்கிறார்கள் அனுபவம் இன்றி
அவர்களை எடுத்தால் கம்பெனியை பொருத்த வரை லாபம் பண விசயத்தில்
ஆக என்னுடைய படிப்பை இன்னும் கூடுதலாயிருக்க வேண்டும்
இவ்வளவு நாள் வேலை பார்த்ததோட அடுத்து ஒருபடி மேலே போனா தான்
சம்பளம் அதிகம் கிடைக்கும் இன்னும் லைப்ல சந்தோசமா இருக்கலாம்
கடன் அடைக்கலாம்
சந்தோசம்னா என்னா? கடன் னா என்ன கடன்

கல்விக்கடனா இல்லங்க அதெல்லாம் அப்பவே அடைச்சாச்சு
அக்கா/தங்கச்சி, அண்ணன்/தம்பி கல்யாண கடனா
எவ்வளவுஙக ஆகும் அதிக பச்சம் 5-10 இலட்சம் அது பிரச்னை இல்லைங்க
யோவ் 10 இலட்சம் சும்மாவ உணக்கு சரி வேற என்ன கடன்
கிரிடிட் கார்ட், கார் வாங்குன லோன்

கிரிடிட் கார்ட் கிட்டதட்ட 1 இலட்சம் வரும்

கார் லோன் 10 இலட்சம் வரும்

எலேய் கல்யாண 10 இலட்சம் கடனை ஒன்னும் இல்லைனு சொல்ற
இது இரண்டும் அவ்வளவு தானே வருது

ஏங்க ஒன்னும் விளங்காத ஆளா இருக்கிங்க
முதல் இரண்டு கடனும் வீட்ல உள்ள யாராவது அடைச்சிருவாங்க
கார் கூட வித்தர்லாம் ஆனா கிரிடிட் கார்ட் தான்

ஆமா நானும் கேக்கனும் தான் நினைச்சேன்
அப்படி என்னடா கிரிடிட் கார்ட்ல செலவு செஞ்ச
பப், பார்ட்டி செலவு தான்
எலேய் இதெல்லாம் நியாமாடா ?
பேச்சிலர் லைப் அனுபவிக்க வேணாமா

மேலே சொன்னது ஒரு சின்ன உதாரணம்

பேச்சிலர் லைப் ன்ற எடத்தில பிரச்சினை ஆரம்பிக்குது

இதுக்கு முன்னாடி யாரும் பேச்சிலர் லைப் அனுபவிக்கலையா

இருந்தது ஒரு வரைமுறைக்குள் தாண்டும் பொழுது

வீட்ல சொல்லிருவாங்க பையன் சீக்கிரம் கால்கட்டை போடு

அப்ப பெரும்பாலும் பிள்ளைங்க பெற்றோரடதான் இருப்பாங்க

வீட்டுக்குள்ளேயே இருந்துகிட்டு எல்லாவிசயம் செய்யமுடியாது மாட்டிக்குவாங்க

அதனால பசங்களும் கண்ட்ரோல் இருந்தாங்க

மீறும் போது கல்யாணம் நடந்துரும்

இன்னைக்கு 300 1000 மைலுக்கு அப்பால் பெற்றோரும் பிள்ளைகளும்

அதுக்கு என்ன செய்யறது வேலை கிடைக்கிற இடத்தில பார்க்க முடியும்

வீட்ல வா உக்காறதுக்கு அவ்வளவு ஆசையா / செலவு பண்ணி படித்தோம்

உங்களை குறைசொல்லலிங்க

இதுமாதிரியான கட்டமைப்பை உருவாக்கின அரசாங்கம் தான் காரணம்

அந்த காலங்களிலும் கம்பெனிகள் வேலை வாய்ப்புகள் அரசாங்கம் உருவாக்கின

ஆனால் பெரிய தொழிற்சாலைகள் உருவாக்கும் பொழுது அருகாமையிலேயே

அவர்கள் தங்குவதற்க்கு குடியிருப்பும் உருவாக்கபட்டன

அதனால என்னென்ன பயன்கள்

1. குடும்பத்துடன் சேர்ந்து வாழ சுலபம் , வேலைபளுவால் உருவான மனசுமைகளும்
குறைவதற்க்கான வாய்ப்பு

2. மேல் சொன்ன வீண் செலவுகள் ,குடும்பத்தினர்க்கும் பிள்ளைகளின் மனகஷ்டங்கள்
எல்லாம் தெரியவரும்

3. எல்லாத்துக்கும் மேல வரைமுறையற்ற விலை உயர்வு இருக்காது

இவங்க எல்லாரும் கம்பெனியின் அருகில் இருக்கறதனால மற்ற இடங்களில்
அதன் பாதிப்பு இருக்காது

பி.கு: இதுமட்டும் காரணம் சொல்ல வரலை
இதுவும் காரணம் அப்படிங்கறது என் எண்ணம்

உங்களோட எண்ணத்தையும் சொல்லுங்க

கனவாகிப்போன நிஜங்கள் /நிஜமான கனவுகள்

2009-03-10T07:30:00.001+05:30

தேக்குமரங்கள் நிறைந்த ஆற்றங்கரை
சில்லென வீசும் காற்று

தை கடைசி வரை
நிறைந்தோடும் ஆறு
போட்டி போட்ட எதிர் நீச்சல்கள்

பொடி நடையாக பத்து பர்லாங்குகள்
கூட சுலபமாக

அனைத்தும் மனதிற்க்கு இனிய
பால்ய காலம்

பத்தடி தூரம் செல்வதற்க்கு வண்டி

அடுப்பங்கரை வரை தண்ணீர் குழாய்

குளிரூட்டபட்ட அறைகள்

அனைத்தும் கிடைக்கின்றது

நிறைவான மனதை தவிர

தேர்தல் திருவிழா

2009-03-03T12:41:00.002+05:30

சீட்டுக்கட்டு ராஜாக்களை
தேர்ந்தெடுக்கும் திருவிழா
வெற்றி பெறுவனுக்கு
மட்டுமே அனைத்தும் சொந்தம்
வெற்றிக்குபின் சீட்டுகட்டுக்கள்
குப்பைக்கு மட்டுமே சொந்தம்
இத்திருவிழாவிலும்
வெற்றி பெறுபவர்களுக்கு
மட்டுமே அனைத்தும்
கொடுத்த வாக்குறுதிகள்
குப்பைக்கு

இயந்திரத்தனமாய் போன கொண்டாட்டங்கள்

2009-02-28T09:00:00.005+05:30

மகிழ்ச்சியாக இருக்கவும்
மனதை உற்சாகபடுத்தி கொள்ளவும்
உருவான திருவிழாக்களும்,
பண்டிகைகளும், இன்று
அயற்சியை உருவாக்குகிறது
தீபாவளி கொண்டாட்டம்
சின்னத்திரையிலும்,வெள்ளித்திரையிலும்
பொங்கல் பயணத்திலே
பாதிநாளும்
மீதி இருக்கும்
பிறந்த நாள் கொண்டாட்டமோ
விடுமுறை நாளை அனுசரித்து
இயந்திரத்தனமாய்

விட்டில் பூச்சிகள்

2009-02-20T13:00:00.008+05:30

அரை வயிறு கூட நிறையாமல் ஆயிரம் பேர்,
அழுகிய முட்டை வீசியதை வினையாக்கி
வீம்புக்காக விதைத்த வீனர்களின் வலையில்
வீழ்ந்த விட்டில் பூச்சிகளாய் 60 க்கு மேல்
ஆதாயம் அடைந்தவர்களாய்
அரசியல்வாதிகளும், ஆகாஷ்வாணிகளும்
எழுத்தாக்க முயற்சிக்கும் நானும்

நம்பிக்கைகள்

2009-02-19T07:34:00.021+05:30

ஆயிரம் கோடி மைல்களுக்கு அப்பால்
உள்ள விண்மீன் கூட்டங்கள்
மையிருட்டு நேரத்தில்
சிமிலி விளக்கின் வெளிச்சத்தை
போன்ற மினுமினுக்கும் வெளிச்சம்
என்றாவது ஒரு நாள்
அத்தி பூத்தாற் போல்
விடி வெள்ளியாய் அருகாமையில்
மிகப்பிரகாசமாய்

உயிரோசை 22-02-09 இதழில்
நன்றி உயிரோசை.
இந்த நேரத்தில், எழுதவே யோசித்து கொண்டிருந்த என்னைஊக்கபடுத்திய அனுஜன்யா அண்ணனுக்கு
நன்றி கூற கடமைபட்டுள்ளேன்
v

புலம்பல்களும் கச்சேரியும்

2009-02-13T10:01:00.003+05:30

டேய் ஏன்டா ரேடியோவை காலையிலேயே அலறவிடற
ஏன் நீ மட்டும் 6 மணிக்கு அலாரம் வைச்சு தூக்கத்தை கெடுக்கிறல்ல
அதனால?வாக்குவாதத்தின் நடுவில் ரேடியோவும் மொபைலும் அனைனக்கபட்டது
இப்படிதான் செய்வேன் என்ன செய்வ,
வாடி மாப்ள ஆபிஸ்க்கு நேரமாயிடுச்சு நைட் வைச்சுக்கிறேன் கச்சேரியை
அலுவலகத்தில் நுழைந்தவுடன் ஜோ உண்னை மேனேஜர் வர சொன்னார்
மண்டகப்படி காத்துக்கிட்டு இருக்கு உள்ள போ
சார் கூப்டிங்களாமே ,
காலையிலிருந்து எத்தனை தடவை கூப்பிடறது
மொபைலையும் சுவிட்ச் ஆப் பண்ணி வைச்சிருக்கிங்க
எதுக்காக நீங்க எல்லாம் மொபைல் வைச்சிருக்கிங்க ( இவர் / கம்பெனி வாங்கி கொடுத்த மாதிரி) இலல சார் பேட்டரி டவுன் ஆயிடுச்சு.
மன்னார் அன்ட் கம்பெனி லிருந்து வர்ராங்க இருந்து முடிச்சிட்டு போங்க
இன்னைக்கு போய் வர சொல்லிருக்கிங்களே சார், கிடைக்கிறதே 1 1/2நாள் லீவு தான் ,
அதுக்காக தான் காலையிலிருந்து ****&*&&%^ப்ள ப்ல ...................
முடிச்சிட்டே போறேன் சார்.
மதியம் அப்பாவிடமிருந்து போன் ஏண்டா தம்பி காலையில
போன் ஆப் ஆயிருந்தது
பேட்டரி டவுன்ப்பா
ஒரு லேண்ட் லைண் வாங்குன்னு சொன்னா கேட்கிறியா
சிக்னல் இல்ல பேட்டரி இல்லைனுகிட்டு
சரிப்பா வாங்கிடறேன்
இரவு 8 மணி போன் அடிக்க
சொல்லு மாப்ளே
நைட் கச்சேரி வைக்கிறேன் சொன்னியே அதுதான் கூப்பிட்டேன்
மண்டை காய்ஞ்சு போய் இருக்கேன் வைக்கிரியா போனை
ஏய் ஏய் வைக்காத பாஸ்கரோட பேச்சிலர் பார்ட்டி
இருக்கு சீக்கிரம் வந்து சேரு :()

அமைதியில்லா விடியல்கள்

2009-02-11T19:09:00.013+05:30

அதிகாலை இதமான குளிருக்கு
இழுத்து போத்தி கொண்டு தூங்கும் பொழுது
இளையராஜாவின் இன்னிசை
மொபைலில் ஒலித்து எழுப்ப
சிறிது நேரம் நகர்த்தி விட்டு தூங்கிபோனேன்
சற்று நேரத்திற்க்கு பின்னர் எழுந்த
எப் எம் இரைச்சலில் எழுந்து விசனப்பட
ஒரு நாளைக்கே இப்படியா?
மறுகேள்விக்கு விடைதெரியாமல்
அலைய தொடங்கியது மனம்
அமைதியில்லா விடியலில்

ஏதாச்சும் செய்யணும் பாஸ்

2009-02-04T17:12:00.008+05:30

இந்த பதிவுக்கு உந்துதல் நர்சிம்

நமக்கு தெரிஞ்சு சில விஷயங்கள் இப்படி செஞ்சா நல்லா இருக்குமே
நர்சிம் ஆரம்பிக்க பெருந்தலைங்க நிறைய பேரு திட்டங்கள் சொல்லிருக்காங்க

இங்க என்னுடையது

இப்ப கல்லூரியில் படித்து முடித்த வுடனே
வேலை கிடைக்கிறது குதிரை கொம்பா இருக்கு
படிச்ச எல்லோரும் அதே துறையில் வேலை பாகிறதும் இல்ல
அரசாங்கம் கல்லூரியில் வெற்றி கரமா வெளியில் வரவங்க எல்லாருக்கும்
போக்குவரத்து காவலர்களவோ அல்லது லக்கி லுக் சொன்ன மாதிரி
அரசாங்கத்தின் சலுகைகளை மக்களிடம் கொண்டு சேர்க்கும் வேலைஇந்த
பதிவுக்கு வருசத்துக்கு குடுத்தா போதும், எந்த காரணத்தை கொண்டும் ஒரு வருடத்திற்கு
மேல் நீடிக்க கூடாது அந்த ஒரு வருடத்திற்குள் அவர்கள் வேலை தேடி கொண்டு
போய்விடலாம் அல்லது அவர்களின் எதிர்கால வாழ்க்கை பற்றி ஒரு தெளிவான
முடிவுக்கு வர முடியும்

இன்னொன்னு அடுக்கு மாடி பார்கிங் கட்டடங்கள்

நெரிசல் மிக்க சாலைகளில் கார் ஓட்டுறது பெரிய விஷயம் அதுக்கப்புறம்
பார்கிங் இடம் தேடுறது ஒரு பெரிய வேலை
அதுக்கு ஒவ்வொரு முக்கியமான இடங்களில் கட்டடங்கள்

இருந்தா சாலையில் நெரிசலும் குறையும் பார்கிங்கும் சுலபமா இருக்கும்

எல்லோரும் வேகமா கைதட்டுங்க

2009-02-01T11:02:00.008+05:30

கடந்த வாரம் பதிவில் படித்த செய்தி
பாண்டிச்சேரி கல்வி கற்றலில் முதல் மாநிலம்
கேரளா பின் தங்கியது
ஆமாம் தமிழ் நாடு என்னாச்சு?
மூணு வருசத்திற்கு முன் இருந்த இரண்டாவது இடத்திலிருந்து
மூணு வருசத்திற்கு பின் மூன்று இடம் பின்தங்கி ஐந்தாவது இடத்திற்கு வந்திருக்கிறது
தொழில் துறையில் , ஐ டி யில் முன்னேறுகிறது தமிழகம், கல்வியில் ??
ஏற்கனவே இருந்த அரசு கலை கல்லூரிகள் அனைத்தும்
பழ்கலை கழகங்களுடன் இணைக்கிறேன் என்ற பேரில்
300 ரூபாய் இருந்த கட்டணம் 3000 ரூபாய் ஆக்கினார்கள்
இதனால் எத்தனை பேரின் கல்வி முறிந்து போயிருக்கிறது?
இப்பவே இப்படினா இன்னும் பத்து வருசத்திற்கு அப்புறம்?

கடந்த ஆட்சி காலங்களில் நடந்த எத்தனையோ திட்டங்கள்
புதிய ஆட்சி வரும்பொழுதெல்லாம் அவை முடங்கி போகின்றன
அது போல கல்வி கட்டணத்திற்கும் ஒரு விடிவு காலம் வருமா

எல்லோரும் வேகமா கைதட்டுங்க அரசாங்கத்தின் காதில் கேட்க

முத்துகுமாரின் இறுதி வேண்டுகோள்

2009-01-30T14:42:00.004+05:30

தீக்குளிக்கப் போவதற்கு சில நிமிடங்களுக்கு முன்பு முத்துக்குமார் வினியோகித்த துண்டு அறிக்கையின் விபரம் வருமாறு:

அருமைத்தமிழ் மக்களே, அநீதிகளுக்கெதிரான போராட்டத்தில் நம் சகோதரர்களும், பிள்ளைகளும் அறிவாயுதம் ஏந்தியிருக்கிறார்கள். நான் உயிராயுதம் ஏந்தியிருக்கிறேன். நீங்கள் நகலாயுதம் ஏந்துங்கள். ஆம், உங்கள் கையில் கிடைத்திருக்கும் இந்தத் துண்டறிக்கையை நகலெடுத்து, உங்கள் நண்பர்கள், உறவினர்கள், மாணவர்கள் வசம் கொடுத்து, போராட்டத்திற்கான ஆதரவைப் பெருகப் பண்ணுங்கள் நன்றி..

விதியே விதியே என்செய் நினைத்திட்டாய் என் தமிழ் சாதியை...

அன்பார்ந்த உழைக்கும் தமிழ்மக்களே...

வணக்கம். வேலைக்குப் போகும் அவசரத்திலிருக்கும் உங்களை இப்படி சந்திக்க நேர்ந்ததற்கு நான் வருந்துகிறேன். ஆனால் வேறு வழியில்லை. என் பெயர் முத்துக்குமார். பத்திரிகையாளர் மற்றும் உதவி இயக்குநர். தற்சமயம் சென்னையில் உள்ள பத்திரிகை ஒன்றில் வேலை செய்து வருகிறேன். உங்களைப்போல் தான் நானும். தினமும் செய்தித்தாளையும், இணையத்தையும் பார்த்து பார்த்து, தினம் தினம் கொல்லப்பட்டு வரும் எம் சக தமிழர்களைக் கண்டு சாப்பிட முடியாமல், தூங்க முடியாமல், யோசிக்க முடியாமல் தவிக்கும் எத்தனையோ பேரில் ஒரு சாமானியன். வந்தாரை வாழ வைக்கும் செந்தமிழ் நாட்டில் சேட்டு என்றும், சேட்டனென்றும் வந்தவனெல்லாம் வாழ, சொந்த ரத்தம் ஈழத்தில் சாகிறது. அதைத் தடுத்து நிறுத்துங்கள் என்று குரல் கொடுத்தால், ஆம் என்றோ இல்லை என்றோ எந்த பதிலும் சொல்லாமல் கள்ள மௌனம் சாதிக்கிறது இந்திய ஏகாதிபத்தியம். இந்தியாவின் போர் ஞாயமானதென்றால் அதை வெளிப்படையாகச் செய்ய வேண்டியதுதானே.. ஏன் திருட்டுத்தனமாக செய்ய வேண்டும்?

ராஜீவ்காந்தியைக் கொன்றார்கள் என்ற சொத்தை வாதத்தை வைத்துக்கொண்டு, சில தனிநபர்களின் பலிவாங்கல் சுயநல நோக்கங்களுக்காக ஒரு பெரும் மக்கள் சமூகத்தையே கொன்று குவிக்கத் துடிக்கிறது இந்திய அதிகார வர்க்கம். ராஜீவ் காந்தி கொலையில் விடுதலைப்புலிகள் மட்டும் குற்றம்சாட்டப்படவில்லை. தமிழக மக்களையும் குற்றவாளிகள் என்று குற்றம்சாட்டியது ஜெயின் கமிஷன் அறிக்கை. அப்படியானால் நீங்களும் ராஜீவ்காந்தியைக் கொலை செய்த கொலைகாரர்கள்தானா?

ஜாலியன் வாலாபாக்கில் வெள்ளையன் கொன்றான் என்றார்களே, இவர்கள் முல்லைத் தீவிலும் வன்னியிலும் செய்வதென்ன? அங்கு கொல்லப்படும் குழந்தைகளைப் பாருங்கள். உங்கள் குழந்தைகள் நினைவு வரவில்லையா? கற்பழிக்கப்படும் பெண்களைப் பாருங்கள். உங்களுக்கு அதுபோன்ற வயதில் ஒரு தங்கையோ, அக்காவோ இல்லையா? ராஜீவ் கொல்லப்பட்டபோது காங்கிரசின் முக்கிய தலைவர்கள் ஏன் அவருடன் இல்லை, கூட்டணிக் கட்சித் தலைவியான ஜெயலலிதா, தமிழ்நாட்டில் ராஜீவ் கலந்துகொள்ளும் ஆகப்பெரிய பொதுக்கூட்டத்தில் ஏன் பங்கெடுக்கபோகவில்லை என்பதுபோன்ற கேள்விகள் கேட்கப்படாமலும், இவர்களால் பதில் சொல்லப்படாமலும் கிடக்கின்றன. மக்களே யோசியுங்கள். இவர்கள்தான் உங்கள் தலைவர்களா? பணம், அடியாள் பலம் ஆகியவற்றைக் கொண்டு மிரட்டல் அரசியல் நடத்தி வரும் இவர்கள் நாளை நம்மீதே பாய மாட்டார்கள் என்பதற்கு என்ன நிச்சயம்? அப்படி பாய்ந்தால் யார் நம் பக்கம் இருக்கிறார்கள்?

கலைஞரா? நாடாளுமன்ற உறுப்பினர்கள் ராஜினாமா செய்வார்கள் என்று அப்பொழுதும் அவர் அறிவிப்பார். பிறகு, மத்திய அரசைப் புரிந்துகொள்வார்(?!). பிறகு மறுபடி சரியான முடிவை எடுக்க வேண்டி சட்டமன்றத்தில் தீர்மானம் நிறைவேற்றுவார் - இந்த மாசம், இந்த வாரம், இதுவரைக்கும் என்ன எவனும் தொட்டதில்ல என்கிற வின்னர் பட வடிவேல் காமெடியைப் போல. காகிதம் எதையும் சாதிக்காது மக்களே! இப்பொழுது, உலகத் தமிழினத் தலைவர் என்ற பட்டப்பெயரைச் சூடிக்கொள்ளவும், தமிழ்நாட்டில் இருக்கும் பணத்தையெல்லாம் தன் குடும்பத்திற்கே உரித்தாக்கவும் விரும்புகிற தேர்தல் காலத் தமிழர் கலைஞர் மக்களின் கோபத்தை எதிர்கொள்ள பயந்து மருத்துவமனையில் போய் ஒளிந்துகொண்டுள்ளார். தனது மந்திரிகளுக்கு அவசியப்பட்ட துறைகளுக்காக சண்டப்பிரசண்டம் செய்து சதிராடிய இந்த சூரப்புலி உண்மையில் தமிழுக்காகவோ, தமிழருக்காகவோ செய்ததென்ன? ஒருமுறை அவரே சொன்னார், ''தேனெடுத்தவன் புறங்கையை நக்காமலா இருப்பா"னென்று. இவருடைய பம்மலாட்டத்தையெல்லாம் பார்த்தால் ரொம்பவே நக்கியிருப்பார் போலிருக்கிறேதே...

பட்டினிப் போராட்டத்தின் மூலம் களம் இறங்கியிருக்கும் சட்டக்கல்லூரி மாணவர்களே... உங்கள் போராட்டம் வெற்றிபெற சகதமிழனாக நின்று வாழ்த்துகிறேன். உங்களோடு களம் இறங்க முடியாமைக்கும் வருந்துகிறேன். ஈழத் தமிழர் பிரச்னை என்றில்லை, காவிரியில் தண்ணீர் விடச்சொல்லும் போராட்டமென்றாலும் சரி, தமிழ்நாட்டிற்காதவரான போராட்டம் எதுவாக இருந்தாலும் சரி, முதலில் களம் காண்பவர்கள் நீங்கள், வழக்கறிஞர்களும்தான். இந்த முறையும் நான்கு மாதங்களுக்கு முன்பாகவே களத்தில் இறங்கியவர்கள் இந்த இரண்டு தரப்பும்தான். உங்களுடைய இந்த உணர்வை மழுங்கடிக்கவே திட்டமிட்டு இந்திய உளவுத்துறை ஜாதிய உணர்வைத் தூண்டிவிட்டு, அம்பேத்கர் சட்டக்கல்லூரி அனர்த்தத்திற்கு வழிவகுத்திருக்கலாம் என்பது என் சந்தேகம். உலகம் முழுக்க மக்களுக்கான புரட்சிகரப் போராட்டங்களில் முன்கையெடுப்பவர்களாக இருந்தது மாணவர்கள் என்கிற ஜாதிதான். அதேபோல், தமிழ்நாட்டிலும் உங்களுக்கு முந்திய தலைமுறையொன்று இதுபோன்ற ஒரு சூழலில், இதுபோல் குடியரசு தினத்திற்கு முன்பு களம் கண்டுதான் காங்கிரஸ் உள்ளிட்ட தேசியக் கட்சிகளைத் தமிழ் மண்ணிலிருந்து விரட்டியடித்தது.

ஆக, வரலாற்று முக்கியத்துவம் வாய்ந்த ஒரு தருணம் உங்கள் கைகளுக்கு மறுபடியும் வந்து சேர்ந்திருக்கிறது. பொதுவாக உலக சரித்திரத்தில் இப்படியெல்லாம் நடப்பதில்லை. கடந்த முறை நடந்ததுபோல், உங்கள் போராட்டத்தின் பலன்களை சுயநலமிகள் திருடிக்கொள்ள விட்டுவிடாதீர்கள். போராட்டத்தின் பலன்களை அபகரித்து ஆட்சிக்கு வந்த தி.மு.க. முதலில் செய்த விசயம் மாணவர்கள் அரசியல் ஈடுபாடு கொள்ளக்கூடாது என சட்டம் போட்டதுதான். ஆட்சிக்கு வந்த அது, தமிழின உணர்வுகளை மழுங்கடித்து, ஒட்டுமொத்த தமிழினத்தையும் மகஜர் கொடுக்கும் ஜாதியாக மாற்றியது. அந்த மரபை அடித்து உடையுங்கள். மனு கொடுக்கச் சொல்பவன் எவனாக இருந்தாலும், அவனை நம்பாதீர்கள். நமக்குள்ளிருக்கும் ஜாதி, மதம் போன்ற வேறுபாடுகளை எரித்துக்கொள்ள இதுதான் தருணம். உண்ணாவிரதத்தையெல்லாம் தூக்கியெறிந்துவிட்டு களம் காணுங்கள். உண்மையில், இலங்கையில் இந்திய ராணுவ நடவடிக்கை என்பது தமிழர்களுக்கெதிரானது மட்டுமல்ல. ஒட்டுமொத்த இந்தியர்களுக்குமே எதிரானது. சிங்களச் சிப்பாய்களிடம் கற்றுக்கொள்கிற பாலியல் நுணுக்கங்களைத்தானே அவர்கள் அசாமில் அப்பாவிப் பெண்களிடம் பரிசோதித்துப் பார்த்தார்கள்! விடுதலைப்புலிகளை ஒடுக்குவதற்கான சிங்கள வன்முறை நுணுக்கங்களைக் கற்றுக்கொண்டு வடகிழக்கு மாநிலப் போராளிகளிடம் பயன்படுத்திக் கூர் பார்த்தார்கள்! போதாதற்கு, ஹைட்டியில் சமாதானப் பணிக்காக அனுப்பப்பட்ட ஐ.நா.வின் ராணுவத்திலிருந்து இந்திய மற்றும் இலங்கை ராணுவம் அவரவர்களுடைய பாலியல் நடவடிக்கைகளுக்காக அடித்துத் துரத்தப்பட்டிருப்பதிலிருந்து என்ன தெரிகிறது - இந்தக் கூட்டணி கொள்கைக்க்கூட்டணியல்ல, பாலியல் கூட்டணி என்றல்லவா!, ஆக இந்திய - இலங்கை இராணுவக் கூட்டு என்பது இந்தியர்களின் அடிப்படை மனித உரிமைகளுக்கும் கூட எதிரானதாக இருப்பதால், அகில இந்திய அளவில் மாணவர்கள், ஜனநாயக அமைப்புகளையும் உங்கள் பின்னால் திரட்டுங்கள்.

இதையெல்லாம் மக்களே செய்ய முடியும். ஆனால், அவர்கள் சரியான தலைமை இல்லாமல் இருக்கிறார்கள். உங்கள் மத்தியிலிருந்து தலைவர்களை உருவாக்குகள். உங்கள் போராட்டத்தை சட்டக்கல்லூரி மாணவர்கல் என்ற இடத்திலிருந்து அனைத்து மாணவர்கள் என்று மாற்றுங்கள். உங்களிடமிருக்கும் வேகமும், மக்களிடமிருக்கும் கோபமும் இணைந்து தமிழக வரலாற்றை அடியோடு மாற்றட்டும். ஆன்பலம், பணபலம், அதிகார வெற்றியை உடைத்து எறியுங்கள். உங்களால் மட்டுமே இது முடியும். ‘நாங்கள் தமிழ் மாணவர்கள், தமிழ்நாட்டின் உயிரானவர்கள், இங்கு தமிழினம் அமைதிகொண்டிருந்தால் ஏடுகள் தூக்கி படிப்போம். எங்கள் தமிழர்க்கின்னல் விளைந்தால் எரிமலையாகி வெடிப்போம்‘ என்ற காசி அனந்தனின் பாடலை ஓர் அறிவாயுதமாக ஏந்துங்கள்.. என் உடலை காவல்துறை அடக்கம் செய்துவிட முயலும். விடாதீர்கள். என் பிணத்தைக் கைப்பற்றி, அதை புதைக்காமல் ஒரு துருப்புச் சீட்டாக வைத்திருந்து போராட்டத்தைக் கூர்மைப்படுத்துங்கள். எனக்கு சிகிச்சையோ, போஸ்ட்மார்டமோ செய்யப்போகும் தமிழ்நாடு மருத்துவக் கல்லூரி மாணவர்களே.. உங்கள் கையால் அறுபட நான் புண்ணியம் செய்திருக்க வேண்டும். காரணம், அகில இந்திய அளவில், மருத்துவக் கல்வியில் இட ஒதுக்கீட்டுக்கு எதிராக உயர்சாதி மாணவர்கள் போராடிக்கொண்டிருக்க, தன்னந்தனியாக நின்று, மருத்துவக் கல்வியில் இடஒதுக்கீட்டுக்கு ஆதரவாகப் போராடியர்களல்லவா நீங்கள்? எனக்கு செய்வதெல்லாம் இருக்கட்டும். நம் சகோதரர்களான ஈழத்தமிழர்களுக்கு உங்கள் பங்குக்கு என்ன செய்யப் போகிறீர்கள்?

தமிழீழம் என்பது தமீழத்தின் தேவை மட்டுமே அல்ல, அது தமிழகத்தின் தேவையும் கூட காரணம், இராமேஸ்வரம் மீனவர்கள், உலகில் ஆடு, மாடுகளைப் பாதுகாப்பதற்குக் கூட சட்டமும், அமைப்புகளும் இருக்கின்றன. இராமேஸ்வரம் தமிழனும், ஈழத்தமிழனும் மாட்டைவிட, ஆட்டைவிடக் கேவலமானவர்கள்? எல்லை தாண்டி போகும் மீனவர்கள், புலிகள் என்ற சந்தேகத்தின் பேரில் தாக்கப்பட்டு வருவதாக இந்திய மீடியா திட்டமிட்டு பிரச்சாரம் செய்து வருகிறது. இவர்களெல்லாம் செய்தித்தாளே படிப்பதில்லையா? சென்னையின் கடற்கரைகளில் அடிக்கடி தைவான் நாட்டை சேர்ந்த மீனவர்கள் வழிதெரியாமல் வந்த்வர்கள் என்று கைது செய்யப்படுகிறார்கள். பல ஆயிரக்கணக்கான கிலோமீட்டர்கள் தூரத்திலிருக்கும் தைவான் மீனவன் வழிதவற முடியுமென்றா, வெறும் பன்னிரெண்டு மைல் தூரத்திற்குள் இராமேஸ்வரம் தமிழன் வழிதவறுவது நம்புவது மாதிரியில்லையாமா?

தமிழ்நாட்டில் வாழ்ந்து வரும் வெளிமாநிலங்களைச் சேர்ந்த சகோதர்களே...

உங்கள் சொந்த மாநிலத்தில் கூட இல்லாத நிம்மதியோடும், பாதுகாப்போடும் வாழக்கூடிய மாநிலம் தமிழ்நாடு தான் என்பது உங்களுக்கு அனுபவத்தால் தெரிந்திருக்கும். நாங்கள் இன்று பெரும் இக்கட்டை எதிர்நோக்கியிருக்கிறோம். ஈழத்திலிருந்துக்கும் எங்கள் சகோதரர்கள் இந்தியர் என்னும் நம் பெயரைப் பயன்படுத்திதான் நம் அரசால் கொலை செய்யப்படுகிறார்கள். இந்தப் போராட்டத்தில் நாங்கள் தனித்துவிடப்படுவதை இந்திய அரசு விரும்புகிறது. அப்படி ஆக்கக்கூடாதென நாங்கள் விரும்புகிறோம். ஆகவே, போராடிக்கொண்டிருக்கும் எங்கள் சகோதரர்களுக்கு உங்கள் ஆதரவும் உள்ளதென மத்திய அரசுக்குத் தெரியப்படுத்துங்கள். அரசுகளில் அங்கம் வகிக்கக்கூடிய உங்கள் தேசிய இனங்களைச் சேர்ந்தவர்களை எம் கரத்தை பலப்படுத்துவதோடு, எதிர்காலத்தில், ஒரு நவநிர்மாண் சேனாவோ, ஸ்ரீராம் சேனாவோ தமிழ்நாட்டில் உருவகவிருக்கும் ஆபத்தைத் தவிர்க்கும் என்பது என் கருத்து.

தமிழ்நாடு காவல்துறையிலிருக்கும் இளைஞர்களே...

உங்கள் மீது எனக்கு இருக்கும் மதிப்பு கொஞ்சம் நஞ்சமல்ல, காரணம், தமிழுக்காக மற்றவர்கள் என்ன செய்தார்களோ, அலுவலர்களை ஐயா என அழைப்பது போன்ற நடைமுறை ரீதியில் தமிழை வாழ வைத்துக்கொண்டிருப்பவர்கள் நீங்கள்தான். மக்களுக்காகப் பாடுபடவேண்டும், சமூக விரோதிகளை ஒழுத்துக்கட்ட வேண்டும் என்பதுபோன்ற உன்னத நோக்கங்களுக்காகத்தான் நீங்கள் காவல்துறையில் இணைந்திருப்பீர்கள் என்று நம்புகிறேன். ஆனால், அதை செய்ய விடுகிறதா ஆளும் வர்க்கம்? உங்களை சிறுசிறு தவறுகள் செய்ய விடுவதன் மூலம் தன்னுடைய பெருந்தவறுகளை மறைத்துக்கொள்ளும் அதிகார வர்க்கம், உங்களை, எந்த மக்களுக்காகப் பாடுபட நீங்கள் விரும்பினீர்களோ, எந்த மக்களுக்காக உயிரையும் கொடுக்கலாம் என்று தீர்மானித்தீர்களோ, அந்த மக்களுக்கெதிராகவே, பயிற்றுவிக்கப்பட்ட அடியாள்களாக மாற்றுகிறது. டெல்லி திகார் ஜெயிலைப் பாதுகாப்பது தமிழக போலீஸ்தான். இந்தியாவில் பழமையான காவல்துறையான தமிழக காவல்துறை சிறப்பாக செயல்பட்டு வரும் காவல்துறைகளில் ஒன்று. ஆனால் அந்த மதிப்பை உங்களுக்குக் கொடுக்கிறதா இந்திய அரசாங்கம்! மத்திய அமைச்சர் ப.சிதம்பரம் தமிழகம் வந்து திரும்பிப்போகையில், சென்னை விமான நிலையத்தில், அவருக்கான பாதுகாப்பை வழங்க அனுமதிக்க மறுத்திருக்கிறார்கள் மத்திய காவல் அதிகாரிகள். ஏனென்று கேட்டதற்கு, ராஜீவ் காந்தியை நீங்கள் பாதுகாத்த லட்சணம் தான் தெரியுமே என்று கிண்டல் செய்திருக்கிறார்கள். ராஜீவ்காந்தியைத் தமிழக காவல்துறையால் காப்பாற்ற முடியவில்லை என்பது எவ்வளவு உண்மையோ, அதே அளவுக்கு உண்மை, ராஜீவோடு இறந்தவர்களில் பலர் அப்பாவி போலீஸ்காரர்கள் என்பது. உங்கள் அர்ப்பணிப்புணர்வு கேள்விக்காப்பாற்பட்டது. ஆனால் மேற்படி வெண்ணெய் வெட்டி வீரரர்கள் - அதுதான், இந்திய உளவுத்துறை - ராஜீவின் உயிருக்கு ஆபத்து இருக்கிறது என்ற தகவலை அறிந்தபோதும் மெத்தனமாக இருந்தது என்பது பின்னர் அம்பலமானதல்லவா... இதுவரை காலமும் நீங்கள் அப்பாவி மக்களுக்கெதிராக இருந்தாலும் தமிழகத்தின் பெருமைகளில் ஒன்றாகத்தான் இருக்கிறீர்கள். வரலாற்று முக்கியத்துவம் வாய்ந்த
இந்த தருணத்தில், நீங்கள் மக்கள் பக்கம் இருந்தால் மட்டுமே மக்களிடம் இழந்திருக்கிற பெருமையை மீட்டெடுக்க முடியும். ஒருமுறை சக தமிழர்களுக்காக அர்ப்பணித்துப்பாருங்கள். மக்கள் உங்களை தங்கத்தட்டில் வைத்து தாங்குவார்கள். தமிழனின் நன்றி உணர்ச்சி அளவிடற்கரியது. தன்னுடைய சொந்தக்காசை வைத்து அணை கட்டிக்கொடுத்தான் என்பதற்காகவே அவனுக்கு கோயில் கட்டி. தன் பிள்ளைகளுக்கு அவன் பெயரை வத்துக் கொண்டாடிக்கொண்டிருக்கிறான் முல்லையாற்றின் மதுரை மாவட்டத்தமிழன். நீங்கள் செய்ய வேண்டியதெல்லாம், கொந்தளிக்கப் போகும் தமிழகத்தில், மத்திய அரசு அதிகரிகளுக்கு ஒத்துழைக்க மறுப்பது, ரா, சி.பி.ஐ போன்ற அமைப்புகளைச் சேர்ந்தவர்களை உள்ளூர் மக்களுக்கு அடையாளம் காட்டுவதும்தான். இதை மட்டுமாவது செய்யுங்கள். மற்றதை மக்கள் பார்த்துக்கொள்வார்கள்.

களத்தில் நிற்கும் தமிழீழ மக்களே, விடுதைலைப்புலிகளே...

அனைத்துக்கண்களும் இப்போது முல்லைத்தீவை நோக்கி. தாய்த்தமிழகம் உணர்வுபூர்வமாக உங்கள் பக்கம்தான் நிற்கிறது. வேறு ஏதாவது செய்ய வேண்டும் எனவும் விரும்புகிறது. ஆனால் என்ன செய்வது உங்களுக்கு அமைந்தது போன்ற உன்னத தலைவன் எங்களுக்கில்லையே... ஆனால், நம்பிக்கையை மட்டும் கைவிடாதீர்கள். இதுபோன்ற கையறுகாலங்கள்தான். தமிழகத்திலிருந்து அப்படி ஒருவர் இந்தக் காலத்தில் உருவாகலாம் அதுவரை, புலிகளின் கரங்களை பலப்படுத்துங்கள். 1965ல் நடந்த இந்தி எதிர்ப்புப் போரை சில சுயநலமிகளின் கையில் ஒப்படைத்ததால்தான் தமிழக வரலாறு கற்காலத்திற்கு இழுபட்டுள்ளது. அந்தத் தவறை நீங்கள் செய்து விடாதீர்கள்.

அன்பிற்குரிய சர்வதேச சமூகமே, நம்பிக்கைகுரிய ஒபாமாவே,

உங்கள் மீது எங்களுக்கு இன்னும் நம்பிக்கை இருக்கிறது. ஆனால், இறையான்மை கொண்ட ஒரு குடியரசு தம் குடிமகனை இனஒதுக்கல் மூலமாக கொடுமைப்படுத்தாது என்பதற்கு எந்த உத்தரவாதமும் கிடையாது. வசதிக்காக அமெரிக்காவின் கடந்த காலத்தையே எடுத்துக்காட்டாக சொல்லலாம். உலகப்புகழ் பெற்ற குத்துச்சண்டை மாவீரன் முகமதலி சொன்னானே, என் சருமத்திலிருக்கும் கொஞ்ச வெண்மையும் கற்பழிப்பின் மூலமாகவே வந்திருக்குமென்று... நீங்கள் அமைதியாக இருக்கும் வரை இந்தியா வாயே திறக்காது. ஒட்டுமொத்த தமிழர்களும் அழிக்கப்பட்ட பிறகு வேண்டுமானால் அது நடக்கும். அதுவரை, இந்தியாவின் வாயைப் பார்த்துக்கொண்டிருக்கப் போகிறீர்களா? வன்னியில், விடுதலைப்புலிகளூக்கு எதிரான போர்தான் நடக்கிறது என்கிறார்கள். புலிகள் மக்களைக் கேடயமாகப் பயன்படுத்துகிறார்காள் என்கிறார்கள். அப்படியானால் அரசு சொன்ன பகுதிக்கு வந்த மக்களை ஏன் கொலை செய்தார்கள்? இது ஒன்று போதுமே, தமிழ்மக்கள் விடுதலைப்புலிகளைச் சார்ந்து நின்றாலும் சரி, இலங்கை அரசைச் சார்ந்து நின்றாலும் சரி, தமிழர்கள் என்ற காரணத்திற்காகவே அவர்கள் கொல்லப்படுகிறார்கள் என்பதற்கு. இது இனப்படுகொலை இல்லையா? இந்தியா, பாகிஸ்தான், சீனா ஆயுதம் கொடுத்தும், ஜப்பான் பணம் கொடுத்தும், கூடுதலாக, இந்தியா நாட்டாமை செய்தும் தமிழர்களைக் கொள்கின்றனரென்றால். நீங்கள் உங்கள் மெளனத்தின் மூலமாகவும், பாராமுகத்தின் மூலமாகவும் அதே கொலையைத்தான் செய்துகொண்டிருக்கிறீர்கள் என்பதை ஏன் உணரவில்லை? ஆயுதம் தாங்கி போராடுவதால் மட்டுமே யாரும் தீவிரவாதியாகிட மாட்டார்கள். அறத்திற்கே அன்பு சார்பென்ப அறியார். மறத்திற்கும் அஃதே துணை என்று பாடியுள்ளான் எங்கள் திருவள்ளூவர்.

புலிகள் ஆயுதங்களைக் கீழே போட வேண்டும் என்கிறார் ஜெயலலிதா - என்னவோ பிரச்சினையே புலிகள் ஆயுதம் அடுத்ததால்தான் வந்தது என்பதைப் போலெ.. உணமையில், புலிகள் தமிழீழ இன அழிப்பிலிருந்து உருவாகி வந்தவர்களே தவிர, காரணகர்த்தாக்கள் அல்லர்(they are not the reason: just an outcome)

இந்திய அரசு இந்தப் பிரச்சினையில் ஈடுபட்டிருப்பது வெளிப்படையாகாத வரை, இலங்கைப் பிரச்சினை உள்நாட்டுப் பிரச்சினை. அதில் தலையிட முடியாது என்றது. சீனா, பாகிஸ்தான் அமெரிக்கா போன்ற நாடுகள் இலங்கையில் ஆதிக்கம் பெறுவதைத் தடுப்பதற்காக செய்வதாகச் சொன்னது. நாடாளுமன்றத்தில் தாக்குதல் நடத்திய, மும்பை தொடர்வெடிகுண்டுகள், பிறகு அண்மையில் நடந்த தாக்குதல் எனப் பலவாறாக இந்திய மக்களைக்கொண்று குவித்த பாகிஸ்தானோடு இணைந்து கொண்டு தமிழர்களைக் கொண்று குவிக்கிறது. அப்படியானால், பாகிஸ்தானின் இந்திய மீதான பயங்கரவாதமென்பது இந்தியா-பாகிஸ்தான் இருதரப்பு அதிகார வர்க்கங்களும் தங்கள் மக்களைச் சுரண்ட பரஸ்பர புரிதலுடன் உருவாக்கிக் கொண்ட ஒன்று என்ற எம் சந்தேகம் ஒருபக்கம் இருக்க, இப்போது, விடுதலைப்புலிகள் தீவிரவாதிகள் அதனால்தான் சண்டை என்கிறது. ராஜீவ் காந்தியைக் கொன்றார்கள் என்கிறது. ராஜீவ்காந்தி ஒரு கவுன்சிலரோ, மாவட்டச் செயலாளரோ அல்ல. அவ்ரை ஏற்கனவே ஒருமுறை கொலை செய்யும் முயற்சி இலங்கையில் நடைபெற்றிருந்த போதும் அந்தக் கொலைகாரன் விசாரிக்கப்படவில்லை. ராஜீவ்காந்தியைக் கொல்ல முயன்ற அந்த சிங்கள வீரன் ஆகியோரையும் குற்றம் சாட்டப்பட்டவர்களாக இணைத்துக்கொண்டு மறுபடியும் விசாரிக்கப்பட வேண்டும் என்பது என் கோரிக்கைகளில் ஒன்று. ராஜீவ் மீது புலிகளுக்கு வருத்தம் இருந்திருக்கலாமே தவிர, கோபம் இருந்திருக்க வாய்ப்பில்லை. காரணம், ராஜீவ் இந்திராவின் புதல்வர். இந்திரா, தமிழீழத்தின் சிறுதெய்வங்களில் எம்.ஜி.ஆருக்குப் பக்கத்திலிருப்பவர்.

இந்தியா சொல்லும் காரணங்கள் அடிக்கடி மாறுவதிலிருந்தே இந்தியா நியாயத்திற்குப் புறம்பாகத்தான் இந்தப்போரில் ஈடுபட்டிருப்பது அம்பலமாகி இருக்கிறது. இப்படிப்பட்ட ஒரு சூழலில் நீங்கள் ஏன் நேரடியாகத் தலையிடக்கூடாது? புலிகள் போர்நிறுத்தத்தைப் பயன்படுத்தி ஆயுதம் குவிக்கிறார்கள் என்றது இலங்கை. சந்திரிகாவோ, ரணிலோ, மகிந்தாவோ கடந்த காலங்களில் ஒரு கடவுளாக அல்ல, மனிதர்களாகக்கூட நடந்துகொண்டதில்லை. இவர்கள் ஒரு நிர்பந்தத்தின் பெயரில் போர் நிறுத்தத்திற்கு ஒப்புக்கொண்டுவிட்டார்கள். என்பதால் மட்டுமே போராளிகள் ஆயுதங்களை ஒப்படைத்துவிட வேண்டும். புனரமைப்புப் பணிகளில் ஈடுபடக்கூடாது என்று எதிர்பார்ப்பது என்னவகை நியாயம்? தாங்கள் நேர்மையாக நடந்துகொள்வோம் என்ற நம்பிக்கையை உண்டாக்குவது மூலமாக மட்டுமே போராளிகளை-ஆயுதத்தைக் கீழே வைக்கச்செய்ய முடியும். கடந்த கால அரசுகள் எவையும் அப்படி செயல்படவில்லை. உதாரணம் ரணில்- கருணா. ஆனால், புலிகள் போர்நிறுத்தத்தைப் பயன்படுத்திக்கொண்டு செய்தது ஆயுதம் வாங்கியது மட்டுமல்ல, அது காலாகாலமாக நடப்பதுதானே- ஓர் அரசு நிர்வாகத்தையே உருவாக்கியுருக்கிறார்கள். சர்வதேசத்தின் கண்களில் இது தீவிரவாதமா? அப்பாவித்தமிழர்களைக் காப்பதற்காகத்தான் போரிடுவதாக பசப்புகிறது இந்தியா. ஆயுத தளபாடங்களும், உளவு விமானங்களும்தான் இலங்கை போகின்றனவே தவிர, இந்தியாவால் அனுப்பப்பட்ட ஒரு பாராசெட்டமால் மாத்திரையைக் காட்டச் சொல்லுங்கள் பார்க்கலாம். இந்த லட்சணத்தில், தமிழீழ மக்களுக்கான வசதிகளை இலங்கை அரசு செய்யுமாம். அதற்கு இந்தியா உதவுமாம்... வேலிக்கு ஓணான் சாட்சி! இப்போது சர்வதேச செஞ்சுலுவைச் சங்கத்தின் ஆம்புலன்ஸ்களைத் தாக்கினார்களே, அவர்களும் விடுதலைப்புலிகளா? ப்ரான்சின் 17 மனித உரிமையாளர்களைக் கொலை செய்தார்களே, அவர்களும் விடுதலைப்புலிகளா? சீனாவின் டாங்கிகள், இந்தியாவின் உளவு விமானங்கள், பாகிஸ்தானின் ஆர்டிலரிகள் மட்டுமல்ல... இப்போது எம்மக்களைக் கொலைசெய்து வருவது சர்வதேச சமூகத்தின் மெளனமும்தான் என்பதை எப்போது உணர்வீர்கள்-நியாயத்தின்பால் பெருவிருப்பு கொண்ட ஒரு மக்கள் சமூகம் பூமியிலிருந்து முற்றாகத் துடைத்தழிக்கப்பட்ட பிறகா? அபாரிஜின்கள், மாயா, இன்கா வரிசையில் நாங்களும் சேர்க்கப்படுவது உங்கள் நோக்கமென்றால், எங்கள் பழங்கதைகள் ஒன்றின்படி ஒவ்வொருநாளும் ஏதேனும் ஒரு வீட்டிலிருந்து ஒருவர் வந்து உங்கள் முன்னால் தற்கொலை செய்து கொள்கிறோம்... எங்கள் சகோதரிகளையும், குழந்தைகளையும் விட்டுவிட்டுச் சொல்லுங்கள். தாங்க முடியவில்லை. அவர்களெல்லாம் மனமார சிரிப்பதை ஒருநாள் பார்ப்போம் என்ற நம்பிக்கையில்தான் நாங்கள் போராடிக் கொண்டிருப்பதே. ஒரு பேச்சுக்கு ஒத்துக்கொள்வதென்றாலும்கூட, விடுதலைப்புலிகள் தண்டிக்கப்பட வேண்டியவர்கள் என்றாலும் அப்படி ஒரு தண்டனையை வழங்கும் யோக்கியதை இந்தியாவுக்கோ, இலங்கைக்கோ கிடையாது.

காலம் கடந்து வழங்கப்படும் நீதி அநீதியைவிடக் கொடுமையானது.

1. இந்தியா உடனடியாக தமிழீழத்தின் பகுதிகளிலிருந்து தன் துருப்புகளைத் திரும்பப் பெற்றுக்கொள்வதோடு, மேற்கொண்டு செயற்கைக்கோள் உதவிகள், ராடார் போன்ற உதவிகளைச் செய்யக்கூடாதென்று சர்வதேச சமூகத்தால் கண்டிக்கப்பட வேண்டும். இலங்கையோடு இந்தியா அரசு நடந்தும் முக்கியத்துவமற்ற பேச்சுப்பரிமாற்றங்கள்கூட சர்வதேச சமூகம் மூலமாகவே நடக்க வேண்டும். தமிழக மக்களிடமும், உலகெங்கும் பரந்து வாழும் தமிழீழத்தாரிடமும் இந்தியா பகிரங்க மன்னிப்பு கோர வேண்டும்.

2. ஐநா பொதுச்செயலாளரான பான் கி மூன், தொடர்ந்து தன் தாயகமான சீனாவிற்கு ஆதரவான நிலைப்பாட்டிலிருந்து, ஒருதலைப்பட்சமாக செயல்பட்டு வருவதால், ஈழம் தொடர்பான முடிவெடுக்கும் அதிகாரம் அவருக்கு வழங்கப்படக்கூடாது.

3. இலங்கை அரசு எந்தெந்த நாடுகளிடமெல்லாம் கோரப்பட்டு புலிகள்மீது தடை விதிக்கப்பட்டதோ அந்தந்த நாடுகளில் புலிகள் மீதான தடை நீக்கப்பட்டு, தடை செய்யப்பட்ட அமைப்பின் உறுப்பினர் என்ற குற்றத்திற்காக சிறையிலிருக்கும் அதன் உறுப்பினர்கள் எதுவித நிபந்தனையுமற்று உடனடியாக விடுதலை செய்யப்பட வேண்டும்.

4. புலிகளின் உறுப்பினர்கள் மீதான பாஸ்போர்ட் தொடர்பான குற்றங்கள் மன்னிக்கப்பட்டு, அவர்கள் விடுதலை செய்யப்பட வேண்டும்.

5. புலிகளோடு தொடர்புடையது என்னும் குற்றச்சாட்டின் பேரில் தடை செய்யப்பட தொழில் நிறுவனங்களின் உரிமம் மீண்டும் அளிக்கப்படுவதோடு, தக்க நட்ட ஈடும் வழங்கப்பட வேண்டும்.

6. ராஜீவ்காந்தி கொலை வழக்கு இண்டர்போலால் விசாரிக்கப்பட்டு, உண்மையான குற்றவாளிகள் இனம்காணப்பட வேண்டும்.

7. பிரணாப் முகர்ஜி, கோத்தபாய ராஜபக்க்ஷே, சந்திரிகா, உதயணகார, கேகலிய ரம்புக்வெல, பசில்ராஜப்க்ஷ மகிந்த, பொன்சேகா போன்றோர் நார்கோ அனிலிசிஸ் சோதனைக்குப்பட வேண்டும்.

8.அமைக்கப்படபோகிற தமிழீழத்தை அங்கீகரிக்கிற உரிமையை மட்டுகே சர்வதேசம் மேற்கொள்ளலாமே தவிர, அது யாரின் தலைமையில் அமையவேண்டும என்பதை தமிழீன மக்கள் தான் முடிவுசெய்வார்கள்

9. புலிகள் கை பலவீனமான நேரத்தில், மலையக மக்கள் மீது நடந்த வந்தாக்குதல், எதிர்காலத்தில் அப்பகுதிகளில் மீண்டும் ஒரு பாரிய இன அழிவு ஏற்படுத்தப்படுமோ என்ற அச்சத்தை ஏற்படுத்தியிருப்பதால், மலையக மக்கள் தமிழீழத்தோடு இணைய விரும்புகிறார்களா என்பதை வாக்கெடுப்பு மூலம் அறிந்து அதன்படி செயல்பட வேண்டும் இந்த விசயத்தில் மலையக மக்களின் முடிவே இறுதியானது.

10. சென்னையில், குடிபோதையில் அப்பாவித் தமிழர்கள் மீது துப்பாக்கிப் பிரயோகம் செய்து, நீதிமன்றத்தால் தண்டிக்கப்பட்ட டக்ளஸ் தேவானந்தாவின் தண்டணைக்காலம் பூர்த்தியாகும் காலத்திற்கும் இலங்கைக்குத் தப்பிச்சென்று விட்டதால், அவர் கைது செய்யப்பட்டு, தமிழக போலிசார் வசம் ஒப்படைக்கப்பட வேண்டும்.

11. பத்திரிகையாளரான லசந்தவின் கொலைக்குக் காரணமான அனைவரும் தண்டிக்கப்பட வேண்டும்.

12. தமிழ்நாட்டிற்கு தஞ்சம் புகுந்திருக்கும் சிங்கள பத்திரிகையாளர்களுக்கு தகுந்த பாதுகாப்பு வழங்கப்பட வேண்டும்.

13.தமிழ்நாட்டிற்கு அகதிகளோடு அகதியாக வந்த சிங்களத்தம்பதியர் மீதான பாஸ்போர்ட் குற்றச்சாட்டு நீக்கப்பட்டு, அவர்களும் அகதிகளாக அங்கீகரிக்கப்பட வேண்டும்.

14. சுட்டுக் கொலை செய்யப்பட்ட தமிழக மீனவர்களின் குடும்பங்களுக்கான வாழ்வாதரங்கள் உறுதி செய்யப்பட வேண்டும்.

என்றும் அன்புடன்,

அநீதிகளுக்கெதிரான உங்கள் சகோதரன்,
கு.முத்துக்குமார், கொளத்தூர், சென்னை-99

அரசியல் வேலை பார்க்கும் மனிதர்களே

2009-01-29T15:42:00.003+05:30

தனி ஒரு மனிதனுக்கு உணவு இல்லையெனில்
ஜகத்தினை அழித்திடுவோம்
என்று பாரதி அன்று கூறினான்
இன்று தனி ஒரு மனிதனின்
இழப்பை காட்டி
இந்திய அரசு தமிழ் இனத்தினை
அழிக்க உதவி செய்து கொண்டிருக்கிறது
தமிழகத்தில் அரசியல் வேலை பார்க்கும்
அனைவருக்கும் நெஞ்சில் கொஞ்சமாவது
ஈரம் இருந்தால்
உங்களது பதவிகளை
தூக்கி எறியுங்கள்
அப்படியாவது உதவி நிற்கட்டும்

தமிழக அரசியலில் வேலை செய்யும்
சக மனிதர்களே
சிந்தியுங்கள்

காதல்!!

2009-01-27T14:28:00.008+05:30

ஆசை அறுபது நாள்
மோகம் முப்பது நாள்
யார் சொன்னது
எட்டு ஆசை காலங்களும்
மோக காலங்கள் போனபின்னும்
உன்மேல் உள்ள காதல்
கூடிகொண்டே தான் போகின்றது

சுயநலம்

2009-01-19T00:30:00.007+05:30

ஆரம்பத்தில் அவனுக்குள் இருந்த
ஆசைகள் நிறைவேற்ற
அதற்கான முயற்சிகளில் இறங்கி
லட்சியமாகி போக
இன்று அதுவே அவனுடைய
வாழ்க்கையின் ஒரு அங்கமாக போனதில்
வியப்பதேமில்லை
ஆனாலும் அதுவே அவனை
சக மனிதர்களின் வாழ்க்கையின்
உணர்வுகளை கூட புரிந்து
கொள்ளமுடியாத சுயநலமாகி
பின்னாளில் தன்னுடைய சந்ததியினரின்
வாழ்வாதரதிர்க்கே வழி இல்லாமல்
போகும் என்று அவன் இருப்பதை
கண்டும் காணாமலும்
இருப்பதுவே என் சுயநலமாகி போனது

ஆசை

2009-01-10T00:58:00.004+05:30

பட்டங்களை வைத்துக்கொண்டு
செயற்கை நகரங்களை உருவாக்க
இயற்கை மரங்களை வெட்டும்
கும்பலில் உள்ள நான்
அந்த பெரிய மரத்திலுள்ள
கனியை பறிப்பதற்கு
நீண்ட நாட்களாக முயலுகிறேன்
ஒரு முறை கூட விதைக்காமல்

இன்று மீண்டும் ஒருமுறை வாய்ப்பு
கிடைத்திருக்கிறது
கண்டிப்பாக பறிக்க வேண்டும்
அதை விருச்சமாக்கி மகளிடம்
காண்பிக்க மட்டுமாவது

மாற்றங்களும் தேவதையும்

2009-01-08T01:07:00.009+05:30

எனக்கான என் தேவதை வந்தபிறகு

என்னுடைய நடவடிக்கைகள்

மாறியதாக நண்பர்கள் குறை

கூறினார்கள்!

எங்களுக்கான தேவதை வந்தபிறகு

என் தேவதையை மறந்துவிட்டதாக

குறை கூறுகிறாள் !

மனசு

2009-01-02T23:43:00.003+05:30

முகவரி தெரியாமல்
தத்தளித்து கொண்டிருந்த
குழந்தையுடன் இருந்த முதிர் இளைஞரை
தெளிவு படுத்தி அனுப்பியபிறகு
மனது தத்தளித்தது
அவர் கூறிய அனைத்தும்
உண்மையாக இருக்க வேண்டுமென்று

உறுதிமொழிகள்

2009-01-01T16:18:00.003+05:30

ஆசைகள் அனைத்தும் நிறைவேற்றவும்

அகங்காரத்தை குறைக்கவும்

ஆனந்த கூத்தாடவும்

அறுதியுடிகிறேன்

ஒவ்வொரு புத்தாண்டு அவதானிக்கும் பொழுதும்

அவை முற்று பெறாவிடினும்

அறிமுகம்

2008-12-08T11:49:00.004+05:30

வலைப்பதிவின் பெயரை புன்னகைன்னு வச்சிட்டு முகவரிக்கும் இந்த பேரை தேடினா வேற யாரோ புடிச்சிகிட்டு போய்ட்டாங்க
என்னடாது புன்னகை பேரை வைச்சிகிட்டு முகவரி தேடறதுக்குல்லையேபுன்னகை போய்டும் போலருக்கே
சரி புன்னகை வாங்குறதுக்கு பைசா குடுத்து வாங்கலாமா
அது சரி முதல் பதிவு போடுறதுக்கே ரெண்டு வருசமா வலையுலகத்தை சுத்தி சுத்தி வந்திருக்கேன் உருப்படியா முதல்ல ஒரு பதிவு போடறத பார்ப்போம் அப்புறம் பைசா குடுத்து வாங்கறதா யோசிக்கலாம்
முகவரி பைசா குடுத்து வாங்கலாம்னு யோசிச்சமே
அதையே பேரா வைச்சுட்டா ? ஒரு வழியா பெயரை புன்னகை என்ன விலை வைச்சாச்சு